Кыргыз тили – улуттун дөөлөтү: Кыргыз тил мыйзамынын кабыл алынганына 35 жыл

2024-11-21 08:31:13 116

2024-жылы Кыргыз Республикасынын мамлекеттик тили жөнүндө мыйзамдын кабыл алынганына туура 35 жыл толду. Бул тарыхый дата – кыргыз тилинин улуттук өзгөчөлүгүбүздү сактоодогу маанисин дагы бир жолу эске салган өзгөчө учур. ББжИ министрлиги жарыялаган 3 айлыктын алкагынлда колледжде бир нече иш-чаралар уюштурулуп, өткөрүлдү. 2024-жылдын 20-ноябрь күнү жыйынтыктоочу иш-чара райондук маданият үйүндө өткөрүлүп, кыргыздын унутта калган каада-салттарынан сахналык көрүнүштөр көрсөтүлүп, элдик ырлар аткарылды. Иш-чаранын негизги максаты – кыргыз тилинин коомдогу ролун баса белгилеп, жаш муундардын арасында анын кадырын көтөрүү жана кеңири колдонулушун камсыз кылуу, ошондой эле өсүп келе жаткан жаш муундарга улуттук каада-салттарды үйрөтүү, жайылтуу жана сыйлоого үйрөтүү. Жаштар улуттук каада-салттарды өздөштүрүп, аларды сыйлоо менен өз маданиятын баалайт жана сактайт. Бул жол менен улуттун биримдиги бекемделип, муундар ортосундагы байланыш күчөйт. Каада-салттарды пропагандалоо – бул азыркы глобалдашуу шарттарында кыргыз элинин өзгөчөлүгүн сактоонун жана өнүктүрүүнүн негизги жолдорунун бири. "Өз улутун урматтаган адам – өз келечегин да урматтайт." Иш чарага активдүү катышкан студенттерге Өзгөн райондук Маданият бөлүмү тарабынан баалуу белектер, колледждин Ардак грамоталары тапшырылды. Иш-чара кыргыз тили окутуучусу Б.А.Муратова жана директордун тарбия иштери боюнча орун басары Э.С.Картимбаев тарабынан жогорку деңгээлде уюштурулуп, өткөрүлдү.